Maavitha a ugitiri Embu nimauritue gukorwa metho niguo kuvonokia arimi a Macadamia kumana na wii wa maketha ma mumera ucio.
Akiaria na kameme ga Kimuri FM, munini wa mwenegiti wa kiama kia arimi a macadamia vururiri Nut Traders Association of Kenya (NUTAK), John Njiru Kathangu augite arimi a macadamia makoragwa makinyamarua ni turianime na njira nene.
Kathangu augite tayari wii wa macadamia niwambiriritie miena ngurani ya Embu County na uguo vari na vata arimi na maavitha a ugitiri makorwe metho. Kathangu niworotete onjoria a gatagati (brokers) aria maguragira macadamia varavarari akiuga onjoria acio matithunthuragia na kinyi kiumo kia macadamia maria maguraga.
Kunari uguo, muteteri uyu wa ivoto cia arimi augite kungikirwa watho uria ukaramata uguri na wendia wa macadamia, nwautethererie muno kuvurana na wii na uthukangia wa miti ya macadamia mugundari.
Kathangu uria wanake ni murimi uri ngumo wa macadamia, augite onjoria acio a gatagati mavatii kuvewa marua ma kumetikiria kugura macadamia ni thirikari na gutigirira nimararumirira mutaratara mukinyaniru wa kugura macadamia matagukanyiriria arimi.
-Muriithi Triple M
