Mumbunge wa atumia Countiri ya Embu Jane Wanjuki niuritie mwingi wa Embu gwitikira kwithomera rivoti ya Building Bridges Initiative (BBI) na iria yambiriritie gukinyira mwingi.
Akiaria vuva wa kuvecana mavuku maria mari na rivoti io kuri amemba a kanitha ngurani gicigori mbunge kia Manyatta, Embu, Wanjuki niumenereretie aria maranyitithania rivoti iyo ya BBI na uteti guku akiuga maundu mau kwa maragucia na vuva uthii wa nambere wa akenya.
Mumbunge uyu augite andu engi aria makoretwe makiaria ucuku wa rivoti ino, ni aria matamithomete guku agikirira ati vari na vata wa kwaria ndeto cia rivoti io vuva wa kumithoma.
Augite thirikari tayari niyambiriritie kurekerereria mavuku ma rivoti io kuri mwingi niguo akenya onthe mavote kwithomera na gugatua matua maria magiririkite vindi ya kumikiria kura.
Kavindari wa kau Wanjuki niutarite mwingi wa Embu gukorwa ukirumirira mawatho na mikana iria ivecanitwe niguo kuvurana na gutamba kwa homa ya Corona guku akiuga uvuthia wa mawatho mau utigaririte ruvongeri rwa ukui.
Auritie akenya kwithema gukuiwa ni ngari iria itararumirira mawatho mau niguo kuvonokia miturire yao kumana na murimu ucio kiriga. Kavindari kau, Wanjuki niukumitie atongoria a kanitha na avunjia niundu wa gutigirira ati etikia nimararumirira mataro ma kwithema na murimu ucio vindi iria mari nyombari cia mavoya.
-Muriithi Triple M
