Ngavana wa County ya Embu Martin Wambora niuritie mwingi kuthii na mbere kurumirira mikana na mawatho maria mekiritwe niguo kurua na murimu wa Covid-19. Wambora augite mututhuko wa muthemba wa kathatu wa Covid-19 ukite na mururumo muviu gukira mithemba iria ingi guku akiuria mwingi ndukavuthie mikana iria ivecanitwe ni ruvonge rwa ugima wa mwiri.
Akiaria vindi iria akwamukagira njanjo ya AstraZeneca na iria ithondeketwe niguo kurigiriria andu kumana na homa ya Corona ari thivitariri ya Embu Level 5, Wambora niukumitie njanjo iyo akiuga niivetukitue ni University ya Oxford na mungano wa kimavururi wa ugima wa mwiri niguo World Health Organisation (WHO).
Wambora na uria ni mwenegiti wa kanju ya mangavana Kenya augite thiini wa Africa, mavururi 7 nimo maratumira njanjo io ya AstraZeneca guku akiuria mwingi ndukavitithue ni mavururi maria mararugamia utumiri wayo kwona ati mari na muthemba wingi wa njanjo ya murimu ucio na Kenya iri na njanjo ya AstraZeneca ntheri.
Wambora niuritie mwingi gukorwa tayari kumundwa njanjo io kavinda kao gakinya. Mwenari wake, mwenegiti wa kamiti ya ugima wa mwiri mbungeri ya County ya Embu Muturi Mwombo uria wanake uvetwe njanjo io, augite mbunge ya County ino niiranyita mbaru uvecani wa njanjo io ya AstraZeneca na kuga nwamakuthii na mbere kunyita mbaru mivango iria yonthe igekirwa niguo kuvurana na gutamba kwa homa ya Corona.
-Muriithi Triple M
