Makiria ma athomi 1, 000 kuma Ruguru-Ngandori ward, Manyatta aria mareka kigeranio gia KCPE na KCSE mwaka uyu nimatethetue na indo cia kumatethereria kigeraniori kiu.
Athomi acio mamukirite ikeve iria ikoragwa na utethio muno mathomori ma mathavu, Chemistry na Physics kuma kuri MCA wa ward iyo Muturi Mwombo.
Akiaria vindi ya uvecani wa indo icio, Mwombo augite aciari engi mavota kuremwa kugurira ciana ciao indo cia kumatethia gwika igeranio kumana na uria mavinyiriritwe kimuvuko niundu wa homa ya Corona iria yakinyire Kenya mwaka muthiru mweri wa kathatu.
Kavindari wa kau, Mwombo niuritie athomi gukorwa metho riria magucaria arata ao guku akiuga urata niguo utecaga kana ukathondeka mundu.
Mwenari wake ndagitari Jackson Ngari uria ni mwandiki mukaru ruvongeri rwa kithomo thiini wa ACK Diocese of Embu uria wanake arari mamburari mau, niuritie aciari kumenya kuria ciana ciao iri mavindari monthe munomuno mavindari mama cukuru ivingitwe.
Airi acio mauritie ciana gukorwa na ucamba magika igeranio icio na matikegue guoya niundu wa kavinda karia mekarite mucii cukuru iri mvinge niundu wa mututhuko wa homa ya Corona.
