Makiria ma mbeu mbithi 900 nimevoketwe gutetheka na ciringi million 15.7 kuvetukira kigina gia kurumbuyia mbeu mbithi countiri ya Embu (Embu Youth Trust Fund) thiini wa kigina kia mwaka wa 2020/2021.
Mbeca ino na iria ivecanirwe ni ngavana wa County ino Martin Wambora igatethereria mbeu mbithi aria mareingiria thiini wa mbiacara thiini wa County yonthe. Akiaria vindi ya kuvecana cheque cia mbeca icio, Wambora augite kuma mwaka wa 2014 riria kigina kiu kiathundurirwe, thirikari ya County ya Embu ivecanite makiria ma ciringi million 61 iria itethereretie makiria ma mbeu mbithi 2, 400.
Wambora ongererete nakuga mbeca icio itethetie mbeu mbithi engi kwambiriria mbiacara nini na iria kavindari gaka ithiite na mbere gukura. Wambora augite thirikari ya County ya Embu niirarutithania wira vamwe na mungano wa onjoria rungu rwa kaima gia Kenya National Chambers of Commerce and Industries (KNCCI) ruvonge rwa Embu vamwe na Banki ngurani niguo gukiriria miturire ya mbeu mbithi wonjoriari.
Kunari uguo, Wambora augite kigina giki gikinyaniritie matanya makio na gicunji kia 90 vari igana guku akiuga mbeu mbithi aria magunikite na mikovo kuma kiginari kiu makoretwe matari na thina wa kuriva mikovo io undu wikiritwe kirore ni avithaa munene ruvongeri rwa mbeu mbithi na mithako thiini wa County ya Embu, Samuel Wachira.
Airi aya maugite kuvetukira kigina kiu, ndeto cia gutura wira gatagatiri ka mbeu mbithi igakurwa iri rugano guku akiuria mbeu mbithi acio kumenya taranda ciao kwona ati thirikari yao niivariritie kwigana kumatethia ukuriari wa taranda icio.
