Onjoria thiini wa County ya Embu nimavete thirikari ya County ino kavinda ka mweri umwe tu niguo kuthiria mathina maria mamagumirite megii marivi ma marua ma wonjoria (Business Permit) na magoti maria mengi marivaga.
Ino ni vuva wa igeria ria onjoria aya makienda kwaraniria na ngavana Martin Wambora kuringa ithiga. Kuringana na mwenegiti wa mungano wa onjoria Kenya National Chambers of Commerce and Industries (KNCCI) ruvongeri rwa Embu, John Mugo Mate, onjoria aya makoretwe matakugia mweke wa gutwara mathina mao kuri ngavana Wambora wanagukorwa ni mamwandikirite marua nyiingi makimuvoya kavinda macemanie.
Mate augite onjoria acio matikoragwa makiona macokio ma marua iria mandikagira ngavana undu umarigithagia kana kwa ngavana Wambora amavuthagia kana gwa atakinyagirwa ni marua mau.
Kuvetukira mucemanio wa onjoria uria uretanitwe kuvetukira mungano ucio wa KNCCI tauniri ya Embu, onjoria acio maugite matiri na wiki wa tiga kuvecana kavinda ka mweri umwe niguo mone kana nwamavote kwaraniria na thirikari ya County niguo kuthiria mathina mao.
Onjoria acio matetete na kuga thirikari ya County ya Embu niiramarivia mbeca nyiingi na wa gwikira kironda cumbi, ni ati nimararivithua marivi ma wonjoria ma mwaka wa 2020–mwaka uria mbiacara ciarungamite na ciingi igikua kumana na mututhuko wa homa ya Corona.
Maugite wa tauria thirikari yathegutirie akenya magoti mamwe kaimana, wana thirikari ya County ya Embu yavatii gwika uguo kwona ati matiavota gutwarithia nambere wonjoria wao ta mutugo guku makiuga mari tayari kuriva marivi ma wonjoria mwaka uyu.
Mongererete na kuga mithenya io 30 ingithira matavotete kwaraniria na thirikari ya County na kuthiria mathina mao, makavetukia na mugambo umwe ati gutiri kuriva marivi wa monthe ma wonjoria ma mwaka uyu wa 2021.
Mucemanio ucio urari na onjoria kuma miena yonthe ya Embu. County ya Embu iri icigo-mbunge inya iria ni; Runyenjes, Manyatta, Mbeere North na Mbeere South.
-Muriithi Triple M
Mbica irutitwe online
