Ituu ria kieva niigumirite atwarithia aa vikiviki tauniri ya Embu na icigirira ciake vuva wa atwarithia airi aa vikiviki kuragwa na vikiviki ciao kwiwa na miiri yao gutewa iturari ria Kamiu, Embu.
Atwarithia aya na aria maritie na maruru, mauritie thirikari kumagitira kwona ati atwarithia engi aa vikiviki makoretwe makiuragwa gwa kavinda na gutiri ikinyo riocagirwa aria mageraga ngero icio.
Atwarithia aya maugite maavithaa vorithi makoretwe magondererete wirari gwa kavinda kanene na wona thirikari yarega kumagitira nimagwoca makinyo ma watho njarari ciao niguo megitire.
Wauguo nimauritie thikari gutigirira mikana ya kuma njaa kana curfew niwarumirirwa ni andu onthe , kwona ati aatwarithia aa vikiviki makoretwe makinyamarua ni vorithii mathaa ma curfew makinya nwati kwi andu matigagwa makithirurukaga thiini wa town ino na marekuira andu aya nio makoretwe magitwarithia na mbere ciiko ino cia unyamu.
-Kamuthenya Junior
