Vuva wa onjoria thiini wa County ya Embu rungu rwa mungano wa Kenya National Chambers of Commerce and Industries (KNCCI) kuva county ya Embu mweri umwe ikorwe iri nthiriu ngucanio cia marivi na onjoria, riu ngavana Martin Wambora niucoketie ndumiriri yao.
Kuringana na marua iria yandikiritwe nyomba cia movoro kuma oviciri ya ngavana, Wambora niuthegutiritie onjoria vaini na kugwithia marivi wamwe ma wonjoria na itanya ria kumavonokia kumana na maruru maria mangiukania na homa ya Corona.
Wambora na uria ni mwenegiti wa kanju ya mangavana vururiri, augite vaini cia marivi ma migunda (land rates) na ukombori (rent) mathegutitwe gatagatiri ga tariki 15th April 2021 na May 31st 2021 niguo gutethereria kuthiria marivi maria onjoria matarikitie kuriva (outstanding arrears).
Kavindari wa kau Wambora augite niuthegutiritie onjoria a iravu marivi ma mwaka wa 2020 kwona ati nio mavutirwe na njira nene ni mututhuko wa Covid-19 varia mbiacara ciao ciavingirwe kaimana.
Ngavana uyu ongererete na kuga vaini cionthe cia onjoria cia mwaka wa 2020 niithegutitwe na kugendagendia kavinda ga kuriva marivi ma wonjoria mwaka wa 2021 nginyagia tariki 30th April 2021.
Kunari uguo, Mwenegiti wa KNCCI, Embu nike John Mugo Mate augite kurutirwa marivi mau vanduri va mithenya io nikuvenererua tu kwona ati matiri na utethio munene kuri onjoria aria mavetukirite mathina mengi na amwe kuvinga mawira kaimana kumana na murimu wa Covid-19.
Mate augite vari na vata wa thirikari kwaraniria na onjoria niguo kwona uria mangitethua kumana na mathina maria makoretwe makivetukira kumana na mututhuko wa Covid-19 guku akiuga onjoria mavota kuvinyiririka makiria kuvetukira muthuthuko wa mururumo wa kathatu wa Covid-19 na uria uratumire rais Uhuru Kenyatta kwongerera mawatho mikana miruru ya kuvurana na homa iyo.
Mwenari wake, MCA wa Kiambeere Lenny Masters na uria ni mutongoria wa aria anini mbungeri ya county ya Embu augite wanagukorwa ikinyo ria ngavana Wambora ria kuthegutiria onjoria marivi mamwe ni riaro, ritingovota kuvingua ni kamiti ya wocania wa magoti Embu County Revenue Authority (ECRA) ritavetukirite njarari cia minister wa kigina Embu, vuva ucio rivetukue na mandiko kuringana na watho.
-Muriithi Triple M
