Muthenya wa Njumaa mbega (Good Friday) ni muthenya wakairi wa Easter Triduum iria ni ya mithenya ithatu kuuma muthenya wa aramici nthure. Muthenya uyu ukoragwa wii muthenya wa akristiano kunyitanira makiririkana mathinio ma Muvonokia wetu Yesu Kristu kuvitukira njira ya Mutharaba.
Mwaka uyu mitaratara ni ngurani niundu wa murimu wa Covid-19 na kuringana na mawatho maria mavecanirue ni mwikariri giti wa kiama kia makanitha kigii uramati wa murimu uyu wa Covid-19 nike Arch-bishop Anthony Muheria. Kamiti ino niyareganire na micavara undumwe na mitha cia utuku kavindari gaka ka Easter.
Mitaratara ino nirarumirirue ni makanitha matiganite guku vururiri. Njira ya Mutharaba kanithari wa athure Peter na Paul (Cathedral) itongoretue ni Muthikavu wa diocese ya Embu Paul Kariuki Njiru na vatiri Jacob Ndwiga varia ikikire kivarori kia kanitha uyu.
Vuva ya njira ya mutharaba kurari na ukunguiri wa mugambo niundu gutiina mitha ikikaga muthenya uyu na vindi ya ukunguiri uyu kurari na itiya ria mutharaba.
Muthikavu Kariuki niuritie mwingi gutura na wendo, thayu na kwigucanira ntha. Wauguo mwingi niutaritue kuririkana aria arwaru kavindari gaka ka mututhuko wa kathatu wa murimu wa Covid-19 na njira ya mavoya.
