Cukuru ya SSP gukunguira njorua ya KCPE

Arugamiriri a cukuru ya athure Peter na Paulo (Ss. Peters & Paul) Karurina, Embu nimekinyitie na utuku muciiri kwa umwe wa arutwa ao Iturari ria Ndaguma-Rwika, Embu na uria wikite wega makiria thiini wa maumirira ma kigeranio gia KCPE kia mwaka uyu.

Fidelis Nyakio egwatirite marks 409 thiini wa maumirira ma KCPE maria marekereretwe ni minista wa kithomo vururiri Prof. George Magoha. Nyakio nike wa mbere thiini wa cukuru ino kuria arutwa 60 marekire kigeranio kiu.

Kigeranio gia KCPE vururiri wa Kenya giekirwe mweri wa kathatu mwaka uyu vuva wa mathomo gucokereria kuma riria cukuru ciavingirwe kaimana kurumirira mututhuko wa homa ya Corona mweri wa kathatu mwaka muthiru.

Akiaria na metha ya movoro ya Kimuri FM, Nyakio augite mavoya, kio giake na utethio wa muciari wake na arimu nicio imuvete ucindani ucio guku akiuria arutwa aria engi gwitikia Ngai na gwikira kio maunduri maria mareka.

Sr. Evarline Monyenye , mwarimu munene wa SSP-Karurina augite wanagukorwa arutwa nimekarire mucii kavinda karaca kumanana na kuvingwa kwa macukuru marakoretwe na muvango wa kurumiriria arutwa ao na gutigirira ni marathoma guku akiuga vuva wa gucokereria mathomo, nimarekiririte muno mitaratara ya kuririkania arutwa kiria mathomete (revision).

Riu, Nyakio evokete kuthomera cukururi ya secondary ya Kenya School na vuva ucio athomere mathomo ma wakiri niguo gutethereria andu gukinyira ivoto ciao undu unyititwe mbaru ni ng’ína, Stella Jane Gatavi.

-Muriithi Triple M