Kirikaniro kiugaga ni wega gucokia ngatho niundu wa maundu maria Ngai atwikirite miturireri yetu. Sr Vasilia Runji aina igongona ria gucokia ngatho kanithari wa St John the Evangelist, Kathangariri, Nguviu Parish niundu wa miaka 25 aita sister wa kiungano kia Nazareth Sisters of Announciation. Igongona riri rirekikire muthenya wa njumaviri tariki 18 mweriri.
Akivunjiria etikia muthikavu wa diocese ya Embu na uria nike watongoririe igongona riri Paul Kariuki Njiru agitethererua ni mwene miceni wa Parish ya Nguviu Vatiri Adrian Ireri, niwaugiire gutiri ritana rivuthu na akristiano nimavatii kuthii nambere kuvoera aria mari maritanari ngurani. Muthikavu Kariuki niwongerere na kuuga andu nimavatii kuvoya niguo magie na mwerekera kumana na Ngai wa kumavotithia gutura kuringana na maritana maao.
Sr Vasilia niwaugire maritana monthe maumaga thiini wa micii na nimavatii kumenyererwa na njira iria yagiririte.
Mwenari wake ngina wa Sr Vasilia nike Anastacia Murangi niwaugiire ni wega aciari gukorwa makivecana ciana ciao gutungatira kanitha.
Sr Vasiliana niwakumirue muno ni andu a mucii undumwe na aria makoretwe makirutithania wira nake.
Niundu wa murimu wa Covid-19, muthikavu Kariuki niwaririkanirie andu gukorwa makirumiriria mawatho maria mavecanitue ma kwigita kumana naguo.
Akirikiriria muthikavu Kariuki niuraugiire gutungatira Ngai ti ukombo guku akiuria aciari engi kuvecana ciana ciao thiini wa utungata uyu niguo injili ya Mwathani ithii nambere gutamba.
