Ekari aria matumagira varavara ya kuma Karurumo kuthii Kasafari na iria ya Muurari kuthii Kathanjuri , nimavingite varavara ino ni gukorwa itirathiika.
Ekari aya aria marecuritwe ni marakara maramukire kwinja mitaro varavarari ino na kuvanda ndigu .Aturi aya maugite varavara ino irarimirwe na gutigwa itari mbikire marram undu uthararitie uthii njirari ino.
Ekari aya wauguo nimorotete atongoria ao niundu wa kugucania iguru ria ni uriku avatiie kuthondeka varavara ino na riu mauritie mbunge wa gicigo mbunge kia Runyenjes, Erick Mucangi Karemba na MCA wa wardi ya Kyeni South, Salesio Kimaru ,kwiyumiria na kumathondekera Varavara ino niguo mavote gutuarithia mbiashara ciao vamwe na maundu mengi.
Kunari uguo,akiaria na njira ya mwanya na kameme ga Kimuri FM,MCA wa Kyeni South, Salesio Kimaru, augite varavara ino igiri iria ni iria ya Karurumo-Kasafari,Muurari-Kathanjuri, iri thiini wa gikundi gia C gikundi kia varavara iria ivatie kuthondekwa ni mumbunge.
Kimaru, wauguo niumenereretie giko kia ekari gia kwinja mitaro na kuvanda ndigu njirari na kuga nimangiratumire njira mbaro gukinyia mateta mao.
Kimaru augite uria uri na kandarathi ya kuthondeka varavara ino aratiganirie uthondeki wa varavara ino mbura yanjia kura nwati wona mbura yathira niugucokereria kuthondeka varavara ino na kuria ekari gukorwa na ukiririria.
–Kamuthenya Junior
