Wagi wa thitima iturari ria Ngarira Mbeere ya itherero kauntiri ya Embu ni umiritie ekari muturire guku magikaa ni mathina maravitukira ni gutura thitima miaka mingi.
Naguo undu wa kieva ni turianime turia twiyumiritie na kumaaira mbeca magitucaga andu maumite kampuniri ya utambia wa thitima ya Kenya power aria mamauragia kwiyungania thiini wa ikundi marute mbeca niguo mekirirwe thitima ,na vuva wauguo makinaurira.
Riu ekari mauritie atongoria ao mwena uyu kumarumbuiya nikwona wana mathomo ma ciana ciao nimaruvutua tondu utuku wakinya matingivota kuthoma wega.
Mwenari wake MCA wa Mbeti South Muriithi Kiura uria wicikene ta Tadpole auritie ekari aya gukorwa metho matigetikie andu aria marametia mbeca makimeririra kumekirira thitima varia augite gwikirwa kwa thitima ni wira wa mumbunge.
-Wanja wa Njiru
