Mbeu mbithi aria maravikania nimauritue kuvikania na njira ya utheri. Ino ni miario yaritue ni Martin Nyaga Nguku uria utwikite kionereria kiega kuri ayouthi a kanitha wa gatoreki wa Kamwimbi, wardiri ya Mbeti South gicigo gia Mbeere South, na a itura riu vuva wa kuvikania gikanitha igongonari riria riekikire Jumamosi tariki 24 mweri uyu wa kana mwaka wa 2021.
Nyaga na uria uravikirie Gladys Nyawira kuma kaunti ya Kirinyaga ni mwenegiti kanithari uyu wa Kamwimbi na uria ukoretwe ari utongoriria gwa kavinda karaca kuuma arikia cukuru wa secondary.
Mwenari wake murungamiriri wake nike Caesar Gatumu Musa uria ni mwenegiti wa kanitha wa gatoreki wa Munyori niuritie mbeu mbithi kuthiria nganja iria ingituma matigeke uviki wa kanitha.
Wavo Gatumo niuritie aciari a kanitha kana arungamiriri aria mauraga vuva wa igongona, kumenya ni miivitwa moocaga na uguo mavatie kurera aria marungamirira nginya magatigithanua ni gikuu.
Wanake Gladys ndatigitwe vuva kwonana gikeno giake na riu niutarite mbeumbithi gukorwa na uugi magicagura mundu wa guturania nake ta muthuri na mutumia.
Riu Nyaga na Nyawira nimataritwe ni ng’ina wao wa kanitha kuivecanaga vari Mwathani na maundu monthe makathii na njira iria ke amurite.
Kwoguo andu aria Ngai nayitithanitie, mundu wana uriku ndakanamatigithanie.
-Mbuya wa Ngari-