Ruvonge rwa ukinyaniria niruvingite vari kavinda ga ciumia inya kana mweri umwe tv imwe guku vururiri ya gicigo kia Mt.Kenya vuva wa tv ino kuonania cartoon ina ura wa nthoni.
Kuringana na ndumiriri iria ivecanitwe yugite mweri wa kana tariki 19 mwaka wa 2021 thaa inyanya cia muthenya thiini wa tavarira ya ciana, cartoon ino yari na maundu megie utumiri wa ndawa cia ndugugio na mbara.
Ndumiriri ino iria yumite kuri murungamairiri wa ruvonge ruru Mercy Wanjau yugite kuonania mbica ta ino nikuthukia ciana iria ivingite cukuru na iri micii.
Ruvonge ruru rwa ukinyaniria rukiorota station ino ni gukorwa yagararite mawatho ma ukinyaniria ma mwaka wa 2009.
Wauguo station ino yuritue gukinyia aruti wira onthe makorwe makivewa mathomo megie mutaratara wa uria ipindi ivatie gukorwa ikionanua vari kavida ka mithenya mugwanja.
Wauguo station ino ivainitwe ciringi ngiri magana matano.
Kuringana na Mrs.Wanjau, station ino igetikirwa gucokereria vuva wa maavithaa a ukinyaniria gwikira kirore nimararumirira mawatho monthe.
Wanja wa Njiru
Mbica irutitue online
