Magana ma ethari ngui kuma gicigori kia Ndunguni-Makima Mbeere ya itherero nimatethekete na irio na indo ciingi cia vata miturireri yao kuvetukira ruvonge rwa ukuria rwa Diocese ya Embu niruo Caritas.
Vatiri murugamiriri wa ruvonge ruu nike Fr. Alex Mati augite macererete ethari ngui acio cukururi wa mucingi wa Ndunguni kuria mekarite kavindari gaka niguo kumava vinya na kumatethia na indo ngurani iria ingimatethia kuthii na mbere na miturire yao ya wa muthenya.
Kumana na ruvonge ruu, ethari ngui acio nimatethekete na Ndigu, tauru cia utheru cia atumia na tissue iguru ria indo ciingi nyiingi guku Fr. Mati akimeririra utethio wingi mavinda mauku. Gukaririkanua ati Diocese ya Embu nwaithiite na mbere kwamukira utethio kuvetukira ovici ya Caritas na itanya ria gutethia ethari ngui acio.
Makiria ma andu 2, 000 nio marekara macukururi ngurani mwena ucio wa ward ya Makima vuva wao kutharirua nyomba na nduka ciao kiumia kimwe kithiru gukirikana maturite migundari ya ruvonge rwa ukuria wa nyunji cia Tana na Athi niruo TARDA.
Fr. Mati atwarite utethio uyu mari vamwe na maavitha a Caritas, maavitha a kameme ga Kimuri 100.6 FM na Fr. Josphat Mwanzia uria ni vatiri mwene miceni ya Makima.
Mwenari wao, ethari ngui acio matongoretwe ni Julius Mwania na Esther Wanja nimacokeretie ngatho Diocese ya Embu niundu wa kumeciria guku makiuria thirikari na atongoria kumatethereria macoke migundari yao wana kana magie vandu vanini tu varia mangita mucii.
Kavindari gaka, makiri ma ethari ngui a Ndunguni-Makima mekarite macukururi matiganite na mari na guoya ya uria miturire yao igekara cukuru ciavingurwa.
-Muriithi Triple M
