Avithaa munene wa vorithi Hillary Mutyambai niwathite ruvua rwa uthuthuria wa wikinai DCI kuthondeka timu ya kuthuthuria ngero ya kunyita mugwate na kuuragwa kwa anduarume aria ana mwena wa Kitengela mithenya kenda mivituku.
Mutyambai aritie ari cukuru wa National Police College mwena wa Kiganjo umunthi varia augite uthuthuria wa timu ino uvatie gukinyua kuri ke vari mweri umwe.
Miario yake yukite wariria kuri na kiriga kia uria anduarume ama ana maurire vuva wa gwikenia kiravuri kimwe mwena wa Kitengela.
Kavindari wa kau, mucii wa Jack Onyango, uria ni umwe wa anduarume ama ana, umunthi maugite ati mwiri uria wonekanire muvurori wa Mathioya ti wa Onyango.
Kunari uguo miiri ithatu niyonekanite, ino ni kuringana na maavithaa aria mararungamirira uthuthuria uyu. Maugite mwiri wa kathatu uronirwe muvurori ni enji a muthanga na uria witikitue gukorwa uri wa Onyango.
Kiumia kimwe kithiru, mwiri uria wirikite ni wa Elijah Obuong weethirwe muvurori wa Mukungai uria uri mita nini kuma muvuro wa Mathioya.
Naguo mwiri wikuiritwe gukorwa wa Benjamin Imbai wonekanire mutituri wa Kieni gicigo gia Gatundu North vakuvi na kaunti ya Kiambu.
Riu mundumurume ucio wingi wa kana Brian Oduor ndecikene kuria ari.
Mbica irutitwe online
