Makiria ma andiki a movoro 1, 278 nio mavutitwe na njira nene thiini wa mitaratara ya kunyivia matumiri manene ma mbeca nyombari cia movoro vanduri va mwaka umwe muthiru.
Murugamiriri munene wa kanju ya nyomba cia movoro vururiri Media Council of Kenya (MCK) nike David Omwoyo, augite aya onthe mavutirwe na njira ya gutigithwa wira kana kunukirwa micara kumana na mututhuko wa homa ya Corona.
Omwoyo augite kumana na mathina mama MCK niyavecanire utethio wa mbeca kuri nyomba imwe cia movoro niguo guitethereria kwirungamia.
Kavindari wa kau, Omwoyo uria waritie mucemaniori wa gukunguira muthenya wa wandiki wa movoro niguo Press Freedom Day, augite makiria ma andiki a movoro 300 nio magwatikanite na murimu wa Covid-19 gukinyagia riu na athatu gatagatiri kao makua.
Athatu aria makwire kumana na murimu ucio ni vamwe na Robin Njogu, Winnie Mukami na Reuben Githinji.
Wavo Omwoyo niumenereretie maavitha a vorithi aria mattatiaga andiki a movoro mari wirari wao mathaari ma mwiyugo kana Curfew guku akiuga mwaka muthiru, MCK irandikithirie makiria ma cira 100 ciigii gukinyangirwa nthi kwa ivoto cia andiki a movoro ni maavithaa a vorithi Kenya.
-Muriithi Triple M
