Wa riri vururi wa Kenya na nthi ngíma ithiite na mbere gukunguira muthenya wa wiathi thiini wa wandiki wa movoro (World Press Freedom Day), andiki a movoro kuma kauntiri ya Embu maugite matiri na undu wa gukenera ndetori ciigii wiathi urutiri wira wao.
Matongoretwe ni mwikariri giti wao Brian Malila wa County FM, andiki aya na aria mathiururukite miena ngurani ya tauni ya Embu maugite mavinda mamwe makoretwe matakuvewa kanya kega ga kuruta wira wao ni maavitha a vorithi.
Maugite gukinyagia riu gutiri undu wikiritwe maavitha aria marivire na magikia ngono andiki a movoro aria marumagiriria womomori wa nyomba cia ekari a Ndunguni, Makima gicigorimbunge kia Mbeere South kiumia kimwe kithiru.
Maugite vari na vata arugamiriri a ivoto cia mwingi na minista wa ugitiri wa ndari Fred Matiang’i matonyerere niguo gutigirira nimakinyirwa ni kivoto kiao. Andiki 9 a nyomba ngurani cia movoro nio marivirwe na magikua ngono ni maavitha a vorithi aria marugamagirira womomori ucio varia amwe matere indo ciao.
Malila augite gukorwa wi mwandiki wa movoro ti kuga wi njangiri na uguo andiki nimavatii kuvewa gitio kiao undu unyititwe mbaru ni Murithi Mugo, mwandiki wa kambuni ya Standard Media Group.
Mugo augite mwandiki wo movoro angika mavitia, avatie kuvirwa igotiri ta andu aria engi kuringana na watho nwati ti kurivwa kana gucunwa indo ciake. Dennis Fundi wa Meru TV augite maavitha a vorithi aria mamaikirie ngono na makimariva mari wirari wao mwena wa Makima, mavatii gwocerwa makinyo maviu ma kiwatho.
-Muriithi Triple M
