Ruvua rwa Embu rwa kanju ya kiivururi ya makanitha Kenya (National Council of Churches of Kenya, Embu Branch, NCCK), niruuritie thirikari gucutha nevenya mugunda wingi wa kwiga andu aria meengatirwe migundari yao mwena wa Makima.
Thiini wa ndumiriri iria ithometwe ni muthikavu Njeru Nyaga uria ni mwenegiti wa kanju ino guku Embu vuva wa mucemanio kuuria Mwamba Imara Centre mwena wa Gakwegori Embu ya ithuiro, kanju ino yugite ni kieva kinene kwona uria andu meengatirwe migundari iyo.
Kanju ino wavo niyuritie thirikari kugwatirira ekari ama thaa ino marambiriria muturire uceru na kuuria mathiria thina uyu kaimana.
Ekari ama a Makima marekara cukururi wa mucingi wa Ndunguni vuva wa kwingatwa migundari mwena wa Mbondoni, Makima ciumia igiri nthiru, migunda iria ruvua rwa ukurua wa mivuro ya Tana na Athi niyo TARDA marauga niyao.
Namo ekari maugite migunda ino ni yao na nikuo maturite kuma guciarwa kwao na matiri na kwingi gwa kuthii.
Mbica irutitwe online
-Mbuya Ngari-
