Rais wa vururi wa Tanzania nike Samia Suluhu muthenya wegoro nurekinyirie mucemanirio ekirite ngunika maniuru na kanyua. Atethereria ake undumwe na andu engi aria marari mucemaniori uyu marekirite ngunika maniuru na kanyua.
Riri ni riita ria mbere Rais Suluhu onekaniite ekirite ngunika maniuru na kanyua ari vururiri ucio. Vindi ya ya mucemanio uyu, Rais Suluhu aririe makiria ma atongiria a nduriri 900.
Akimariria niuravoire muvera niundu wa kuthii mucemaniori mekirite ngunika maniutu na kanyua varia arataririe marociire ikinyo riri niundu andu aria akuru mari ugwatiri wa kunyitwa ni murimu wa Covid-19 na nwaginyagia mamagitire.
Rais Suluhu niwirigite kuanirira gukorwa akithondeka kamiti ya ataaramu aria makamutara uvoro wigii murimu uyu wa Covid-19 vururiri ucio na makinyo maria mavatii guocwa. Guku agikanyiriria matigithii nambere gutecaniria ndeto igii murimu uyu wa Covid-19.
Wauguo Rais Suluhu augite matingivota gutura ta gicigirira na ti kuuga nimavatii gwitikira wa kiria kionthe mareterwa.
Murugamo wa vururi ucio wa Tanzania niundu wa murimu wa Covid-19 ni undu wagegirie nthi ngima na gwata makiria vindi ya wathani wa John Pombe Magufuli.
Mavururi maria mengi magikirira wikiri wa ngunika maniuru na kanyua mwingiri, kwithambia njara na gwikara varaca na mundu uria wiingi, Tanzania matiakanyiriria uramati wa mawatho mama na mavinda mengi aria makiraga ngunika maniuru na kanyua nimakumagwa.
-Kaari wa Mugendi
mbica irutitwe online
