Jumatatu tariki 10 mweri uyu arutwa a cukuru wa mucingi wa Ndunguni gicigo mbunge kia Mbeere ya Itherero, wardiri ya Makima maramukire cukururi uyu wa ta mutugo mari na mwivoko wa kwanjiriria mathomo ma term ya kathatu ta arutwa engi vururiri mugima.
Nwati undu wa kieva ni eti arutwa aya mekorire matukaniritwe kwona ethari ngui aria mengatirwe migundari yao mwena wa Makima ni ruvonge rwa ukuria wa nyunji cia Tana na Athi TARDA marekara cukururi uyu.
John Ndolo ni umwe wa ekari aria marekara cukururi uyu niutariritie mathina maria arutwa aya maravitukira.Ndolo augite kavinda gaka arutwa cukururi uyu maratumira irathi 3 niguo ethari ngui makore na vandu va gwikara
Riu thirikari niyuritue kuthondeka mivango ya uria makuthamithia ethari ngui aya kuma cukururi uyu niguo arutwa makorwe na riera riega ria gutwarithia mivango ya mathomo .
Miario ino irutitwe ni muthikavu wa kanitha wa gatoleki deocesiri ya Embu, Paul Kariuki Njiru uria nwake mwenegiti wa commission ya kithomo rungu rwa mungano wa athikavu a kanitha gatoleki.
Muthikavu augite arutwa aa micii iria yengatirwe kwao mavota kurega gwika waro mathomori ta arutwa engi kwona nimavutirwe na njira nene na mathina mama marega kuthirwa mavota gukarega gwika wega mathomori mwico wa mwaka.
Miario ya muthikavu Kariuki ikinyitwa mbaru ni vatiri Alexandar Mati uria unyitirite ruvonge rwa Cariitas deocesiri ya Embu.Mati augite murutwa avatie gwikara vandu vatari na kithagathago niguo avote gwika wega mathomori.
Mwenari wake MCA wa wardi ya Makima Philip Nzangi, niuritie thirikari ya county rungu rwa utongoria gavana Martin Nyaga Wambora kwiyumiria na kwereithia ekari mivango iraia macote ya kumatethia vuva wa kurirwa ni migunda yao.
Muthenya wa igoro ethari ngui aya gwa kavinda kengi nimaramukire irio vamwe na indo ciingi cia vata kuvitukira kanitha wa Gatoleki deocisire ya Embu igongona ria riatongoretue ni muthikavu Kariuki na varia ekari aya macoketie ngatho ni utethio uyu guku mari na mwivoko thirikari nikumatethia iguo mavote gucokererie mituriri yao wa ta mutugo.
-Kamuthenya Junior
