Raisi Uhuru Kenyatta arevokwa kuthundura kiravu kia 4K Club kia urimi kiumia giuku niguo kiravu giki kiambiririe gwikirirwa macukururi vururiri mugima .
4K irungamiririte ,Kuungana Kufanya, Kusaidia Kenya,Uthunduri uyu urevokwa gugekika kivarori kia mawonania varavarari ya Ngong, Nairobi Jumaa ya tariki 4 mweri wa gatandatu mwakari, atongoria matiganite nimarevokwa gwikinyia mamburari mama ari vamwe na mangavana, anyiti itemi matiganite na arutwa aria makarivithitue.
Kiravu giki itanya riakio rinene ni gutethereria arutwa kwerewa uvoro wiigie urimi mari thiini wa cukuru cia musingi magitumagira migunda iria iri thiini wa cukuru kurima na nginyagia kurithia indo cia nthakame .
Nwati kiravu giki gitikoretwe gikithii nambere uria kwagiririkite na vinya wa kiravu giki ukiambiriria kuthira miakari ya 1990.
Mweri wa kairi mwaka uyu atongoria aria matongoretue ni raisi Uhuru Kenyatta nimavitukirie kiravu gia 4K Club gucokereria macukuri makiuga undu uyu nukuguciriria arutwa engi urimiri.
Wauguo kiravu giki nigikorwa gikegendania vamwe na mutaratara muceru wa kithomo niguo CBC vamwe na agenda inya cia thirikari.
Wanja wa Njiru
Mbica irutitwe online