Kuthurimwa kwa munini wa ngavana kauntiri ya Nyamira James Gesami kuria kurari gwikike muthenya wa umunthi gutinekika vuva wa igoti kuvecana watho wa kurigiriria undu uyu kuthi na mbere.
Igoti rinene ria Nyamira rivecanite watho uyu muthenya wa igoro kuri mbunge ya kaunty ino na kurigiriria Gesami kuthurimwa nginyagia ciira iria akuruvanitue nayo na iria ikinyitue igotiri ni Patrick Atambo ithikirirue na ituiwe.
Gesami nurekinyitie mbere ya mbunge ya kaunty ino kirauko kurua ciuria, nwati akora igoti nirevecanite watho ,uria athikire.
Ngavana wa Nyamira Amos Nyaribo muthenya wa Jumaine niwavecanire ringi ritwa ria uria wari mumbunge wa South Mugirango niguo akorwe akithurimwa na gwoca mweke wa munini wa ngavana.
Ino ni vuva wa Mamcas 21 kuri 36 kuregana na kworotwa kwa Gesami makiuga ndaavecanite certificate cia HELB CRB na EACC.
Marua iria ngavana Nyaribo avecanite kuri mbunge ya kaunty yugite niwamukire rivoti kuuma kuri mbunge ino na itumi iria mavecanire cia kuregana na kworotwa kwa Gesami nwati niwaranirie nake varia augite itumi iria ciamurigiririe riu itiri kuo.
Wanja wa Njiru
Mbica irutitwe online
