Maavitha 2 a vorithi nimakinyitue igotiri inene ria Machakos muthenya wa umunthi gucokia ciira iria mathitangitwe nayo ya gukorwa mauragire mundumurume wa ukuru wa miaka 20 na uria wavingiritwe stationiri ya vorithi ya Matungulu kauntiri ya Machakos.
Igoti kuvitukira mucirithania Nelly Kenei rivecanite watho wa airi aya kuthuthurua meciria na nimathii nambere na kuvingirua vari kavida ka mithenya 19 .
Cornelious Ndambuki na Erick Odhiambo maikirwe ngono vuva wa munene wa nthitango cia mwingi kumorota na gukorwa macangirire gikuo kia Mark Lumbasi.
Kuringana na ruvonge rwa uthuthuria wa wiki nai DCI na ruvonge rwa kuramata uruti wira wa maavitha a vorithi IPOA airi aya mai na ciira wa gucokia vuva wa uthuthuria gwikwa.
Ndumiriri ,iria yavecanitwe na vau kavere ya maavitha a vorithi yaugite Lumbasi nikwa ecuririe nwati mucii wake ugikirira nganja undu uyu.
Andu a mucii aria magirire mwiri wa Lumbasi mortary maugite njara cia Lumbasi ciovanitue murukuthuri na kanyua kari na nguo yake iria yari ndembuku na ngunika kanua na maniuru na maratathi.
Muruwanyina Ezekiel Natala augite gutiri uria Lumbasi angiavotire gwicuria na ekire maratathi kanyuari gake.
Kithimi kia postmortem, kiria giekirwe mwiri wa mutigairi City Mortury Nairobi kionanirie aambite kunyamarua mbere ya auragitwe
Lumbasi aikirwe ngono tariki 8 mweri wa kathatu agikuirwa niwaiite indo cia waki.
-Wanja wa Njiru
mbica irutitwe online
