Mutumia wa miaka 45 kuuma Thika, kauntiri ya Kiambu niurite na njira iina kiriga. Elizabeth Nkatha aurire tariki 27 mweri muvituku, ino ni vuva ya gucoka na mucii aumite gucerera muthuri wake uria wari murwaru na wamukagira urigiti thivitariri nene Kenyatta.
Kurerikana Nkatha atigire thimu yake muciiri gwake kuria Chania Phase II. Murwangina wa Nkatha, Dorcas Kagwiria, augite nimacerete ndere cia runji rwa Chania, thivitari cia Thika Level Five, Naidu, Mulumba, Avenue, Ruiru na Murang’a gutaina umithio.
Ndeto makiria ikiuga Nkatha aina wagagu ni kwona muthuri wake agitumira macini cia kumutethia kuveva. Nkatha acokire mucii na muthenya uria warumirire akithii gicigo kiria maratuma nyomba mwena wa Chania, kuona kana aruti wira mari na thina wowonthe na auma gicigori giki, ndonekanite ringi, ino ni kuringana na muvici Mutembei Murithi.
Uthuthuria uria wikitue thimuri yake na ndumiriri ciake niwonanitie kwiina undu wagendaga nambere muturireri wake utaramenyekana.
Rivoti ya kuura gwake yandikithirue stationiri ya vorithi ya Thika mathaa 48 vuva wake kurega gucoka na mucii. Kagwiria augite maavithaa a vorithi nimamerire gukorwa makiaraniria na station ciingi guku vururiri niguo matethanie gucaria Nkatha.
Mutembei Muriithi uria ni muvici niuritie ngina kumacokerera niundu nimamwendete. Muthuri wake Kiogora, arekererue njumatatu nthiru tariki 1 kuuma thivitari na athiite nambere kwigua wega ari mucii.
Kaari wa Mugendi
Mbica irutitue online
