Mutumia umwe arekuirwa gukorwa ari mwikuirwa munene wa mburagano ya keritu ka miaka inana karia kauragirwe mwena wa Kitegela, kaunti ya Kajiado niwikitue ngono.
Mutumia uyu uria wiina miaka 27 araikirwe ngono muvakari wa Kitengela na Athi River ino ni kuringana na avithaa munene wa DCI kaunti nini ya Isinya Jeremiah Ndumbai.
Gwikua ngono gwake gukinyitie namba ya aria maikitue ngono magikuruvanua na gicanjama giki kia kunyitana migwate murutwa wa kirathi kia grade 2 gukorwa iiri andu athatu.
Ndumbai niwongererete kadi ya thimu iria kurerikana niyo yatumikire kuvurira ngina wa Shantel thimu makimwitia ciringi ngiri Magana mathatu niguo keritu gaka karekererue niyonekanite.
Maavithaa a uthuthuria muthenya wegoro nimarauririe metikirue mathii nambere kuvingiriria Lavington Otengo,uria wiina miaka 27 na Francis Mbuthia wa miaka 42, vanduri va mithenya ingi 10 niguo mavote kurikia uthuthuria.
Otengo, uria ni mutwarithia wa boda boda, aikirue ngono muthenya wa njumatano mwena wa Orata. Kurerikana anyitikanire aina thimu iria kuratuika niyo yatumikire gwitia mbeca.
Nake Mbuthia, aikirwe ngono mwena wa Kiserian, na nike mwene kivande kiria kiatumikire kwandikithia raini ya Airtel na iria niyo yamukire mbeca.
Kaari Wa Mugendi
Mbica irutitue online
