Maita mengi andu monaga maavithaa a vorithi mai andu acuku no mwiciririe uyu nutecaniritue ni umwe wa maavitha aya kuuma iturari ria Kathuriri-Gitare, gicigorimbunge kia Runyenjes Embu County uria wekire giiko kia ntha kwi mwikari wa county ya Kiambu miaka 7 mithiru.
Avithaa uyu wa ceceni ya vorithi ya Makongeni muciri munene wa Nairobi akorire muruaru atari na wagwika muciiri wa Nairobi mwakari wa 2013 na akimutethia undu ukumitue ni mwingi.
Gukinya kwa muthigari uyu na muthuri wake thibitariri ya Kenyatta mwaka ucio kwari kirathimo kuri mucii wa Mary Njoki uria wavirite muthuri wake thivitariri ino kurigitwa murimu wa cancer.
Vuva wa muthuri wa Njoki kumundwa cindano ya kumama na agicererwa ni gukira, gwatuka niwatukanirwe muno tondu gutiri mundu kana murata angiavoire uraro no muthigari uyu niwamwocire na akimuva uraro.
Kuringana na Agnes ndatethagia niguo acokerue ngatho undu uria ucenjetie mwiciririe wa andu iguru rikonie maavithaa a vorithi.
Andu a mucii wa Njoki maracererete Agnes mucii kwao iturari ria Kathuriri-Gitare niguo kumutuga kumana na utethio na umundu uria amonirie.
Agnes niuritie mwingi gwocaga maavithaa a vorithi ta arata na matigetigagire riria maratethania nao.
-Njagi wa Ndathi
