Mathina maria andu mavitukagira vuva wa gutigwa ni endwa ao nimo matumire ekari a itura ria Kamwimbi na matura maria marigicirie kuthondeka gikundi gia gutethanagia gia Kamwimbi Unity Association Welfare. Gikundi giki kiri wardiri ya Mbeti South gicigo mbunge kia Mbeere South kauntiri ya Embu.
Akiaria na kameme ga Kimuri FM mwenegiti wa kiama giki Justus Miano augite nimathinaga muno riria mundu umwe wa matura mau akua na makiria angikorwa arari na bill ya civitari niundu maatindaga varavarari magicangithia mbeca cia kuriva bill iyo, undu uria wamacukumire kuthondeka gikundi giki.
Gikundi giki gikiambiriria kiari na amemba anini nwati riu kithiite nambere na kwandanduka varia riu amemba ni makiria ya andu 500. Kuyandikithia gikundiri giku kuravata mundu wa wonthe uri na mucii kana mwiritu wagire mwana nwati ti muviku.
Kiama giki mugaru na ciama iria ciingi, macemanagia riria kuri na mundu wititwe ni Mwathani, varia macemanagia mithenya ithatu na wa kana makathika mwendwa wao na ivinda riu nirio marutaga mbeca.
Gukorwa mumemba nwanginya mundu akorwe na mitugo miaro na ndagakorwe munyui wa njovi na riria wathii mugaru na mawatho ma gikundi giki ni kwa mundu avainagwa kana akarutwa gikundiri.
Andu aria matari gikundiri giki mwena uyu nimauritue kugwatana na amemba a gikundi giki niguo kuvuthaniria murigo, ino ni kuringana na Lucy wa Tarasisio uria ni mumemba wa gikundi giki.
-Mbuya Ngari-
