Kurari na thagathaga mocariri ya civitariri ya Embu level 5 kiroko kia aramici vuva wa mucii umwe kwithira mwiri wa mwendwa wao utari kuo.
Arangiri marari na kavinda karito kuvoreria mucii na arata aria marari na marakara na makwendaga gutonya kuu kiavinya niguo kwereithua kuria mwiri wa Daisy Karimi uri.
Charity Munyi uria ni mwarwang’ina na mutigairi augite mwarwang’ina akomire civitariri ino ari na thina wa mbigo njumatano ya tariki 16 mweri wa gatandatu mwaka uyu na gukua njumaine ya tariki 29 mweri wa gatandatu mwaka wa uyu wa 2021.
Munyi augite maaverwe mwiri uria utari guo na mauria makiirwa mucii wingi niguo urocire mwiri wa mwendwa wao.
Amemba a mucii uyu maugite meeritwe ati mwiri wa Karimi tayari nimuthike ni mucii wingi mwena wa, Kathangari Embu ya iguru.
Ndagitari Daniel Mugendi uria ni munene wa urigitani civitariri ino augite mavitia nimarekikire riria mucii wa Kathangari uratamburaga mwiri wa mwendwa wao.
Augite mucii uyu niwikirite kirore maroocire mwiri uria utavatie na riu meterere kuvewa watho ni igoti makathikurie mwiri ucio.
Ndagitari Mugendi niumauritie kwerewa niundu mavitia thaa ciingi ni matonyaga na ti gwika gituri.
Mbica irutitwe online
