Kuringana na maumirira vuva ya mwiri wa mvuri mbiacara Peter Ndwiga Njiru kuthinjwa monanitie arathirue vakuvi na gutu gwake gwa mwena wa umutho na rithathi ikiumirira mwenari wake wa urio.
Ndwiga akuire kumana na kuura nthakame nyingi utumbori ino ni kuringana na maumirira maria marekereretue kuuma mocari ya General Kago mwena wa Thika. Ndwiga arathirue ni Corporal Caroline Kangogo, uria wauragire andu airi muthenya umwe.
Kangogo niwacokire kuratha na akiuraga Constable John Ogweno ngariri yake na iria yaigitue thiini wa station ya vorithi kuria Nakuru muthenya wa njumatatu. Niwacokire agitoroka na mucinga muthemba wa Ceska pistol.
Kurerikana Kangogo niwacokire kwonekana Juja muthenya wa ucio varia auragire mundumurume wiingi. Kangongo avenererie avithaa uyu wa kairi na akithii hoteliri ya Dedamax kuria Kimbo mathaari ma thaa ikumi cia kivwai.
Amurathire kiongo mbere ya kuuma roomuri ino thaa thita cia utuku agitorokera kuria gutaramenyekana.
Kuringana na maavithaa a vorithi, Kangogo erire muruti wira hoteliri ino athite kugura ndawa ya magego. Indo iria cianyitikanire kuuma kuri Ndwiga ni Wallet iina kivandi na cavi cia ngari ya Toyota Probox.
Mwingi niuritue gukorwa wii mentho niundu avithaa uyu aravenereria anduarume mbere ya kumauraga. Mwingi nduvatii kumwivoka na arekunikira nguo iria ciecekine ta buibui.
Kaari wa Mugendi
Mbica irutitue online
