Uria wari Rais wa vururi wa South Africa Jacob Zuma niwambiriritie kiovo giake njela kia mieri 15. Zuma anovwa ringi akiriruira wiyathi wa vururi ucio nwati kavinda gaka ovetwe niundu wa mavitia ma kurega kwathikira igoti ndetori igie kuruta wira wake ciirari uria wamugumirite wa ungumania.
Mathina make mambiririe gitinari giake gia kairi ari Rais mwakari wa 2018 varia ambiririe gwikuirwa ni kiama giake kia ANC na ungumania.
Zuma niwaumire gikarori kiria kithondeketwe gia kumuthuthuria kurumirira ciira wake wa ungumania gitathirite. Niwathiire na mbere na kuuga mwene giti wa gikaro kiu Raymond Zondo niwarongorerie mwena umwe na vuva wa gukorwa na aira engi makiuga Zuma ni mungumania.
Zuma ti mugeni magotire kurumirara ciira ciake 16 vamwe na ciira uria wa mwaka wa 1999 ari munini wa Rais varia agurire matharaita kuma vururi wa Europe na mwaka 2006 niwathitangirwe na kunyita mwiritu kiavinya.
Zuma uria wocire utongoria wa kiama kia ANC kuma kuri Thabo Mbeki, niwathiririe kiama giecikene ta the Scorpions kiria Mbeki athondete gia kurua na ungumania ino ni vuva wa kiama kiu kwambiriria kuthuthuria Zuma. Kunari uguo, Zuma niwathondekire kiama kingi kia kurua na ungumania mwaka wa 2019 akithiria gitiina giake gia kairi.
Mbica irutitwe online
