Ciira wigii mburagano wa murutwa wa cukuru ya University ya Rongo nike Sharon Otieno niyambiriritie kuthikirirua waringi umunthi igotiri ria Milimani kuria muciiri wa Nairobi vuva ya igeria ria gavana wa Migori Okoth Obado na uria ukuruvanitue ciirari uyu kuvoya irugamue kuringa ithiga.
Njanji wa igoti inene Cecilia Githua niwathanire kiumia kivituku ciira uyu kuthikirirua nja igotiri riri ria Milimani vandu igemari kuuma umunthi tariki 12 nginyagia tariki 15 mweriri. Kuthikirirua gwa ciira uyu kwarugurirue mweri wa kenda mwaka wa 2018 varia muvango uyu watanyitue kuthii nambere vanduri va mithenya ikumi kuuma tariki 5 nginya 15. Wauguo njanji Cecilia niuritie murugamiriri munene wa nthitango cia mwingi kureta aira a ciira uyu. Mwena wa nthitango wiina aira 37.
Kunari uguo gavana Obado ndanavota guka igotiri niundu wa mawatho maria mavecanitue ma kurua na murimu wa Covid-19 na gwata makiria gicigori kia Nyanza. Aria metikiritue thiini wa igema riri ni aria mathitangitue, mawakiri, aria mari mwena wa nthitango na andu a vakuvi aria metanitue na Sharon.
Aria mathitangitue ciirari uyu ni gavana Obado, mutethereria wake Michael Oyamo na uria wari karani thiini wa thirikari ya kaunti ino ya Migori Caspal Obiero. Athatu aya mari nja na bond; gavana Obado iri ya milioni ithano naao acio angi airi wa mundu bond ya milioni imwe.
Sharon auragirue mwaka wa 2018 na mwiri wake wonekanire mutituri varia kurerikana aurire tariki 3 mweri wa kenda mwaka uyu wa 2018 na mwiri wake ugicoka kuonekana mithenya iiri vuvari wiina ngurario njuku na utetwe mutituri wa Kodera.
Akivecana uira thiini wa ciira uyu ari muira wa mbere ndagitari Johansen Odour na uria ni dagitari wa thirikari ruvongeri rwa kuthinja miiri niutariritie Sharon amunditwe maita mugwanja na aina ngurario ciingi nyingi.
Kaari wa Mugendi
Mbica irutitue online
