Aruti wira a irabu kuma countyiri ya Embu ni mavete thirikari ya county ino nginyagia muthia wa mweri uyu wa muganja kuroria uceru mathaa ma kuruta wira.
Makiaria mari mukawari umwe mwena wa Embu maugite watho uria uvitukitue ni bunge ya county ino niuramatwara ngarama muno tondu urathana biashara cionthe cia njovi kuvingurwa kwambiriria thaa ikumi nemwe kivwai nayo thirikari nene ikathana biashara icio kuvingwa thaa imwe cia kivwai kumana na watho wa curfew uria warutirwe ni Rais Uhuru Kenyatta.
Mwenegiti wa kiama kia avuri biashara county ya Embu KNCCI John Mugoh Mate augite wanathengi wa county kuvitukira Gavana Martin Wambora kuruta watho wa kumatiniria marivi ma licences na gicunji kia 50% riu kwiina maavitha mongererete marivi mau na gicunji kia 100%
Mwenegiti wa kiama kia Embu Liqour Association James Mbogo aravoya thirikari ya county ya embu kumavithiria watho uyu nigwo biashara cio itikathire na aruti wira ao matigature wira.
Miario ya Mbogo niigwatitwe mbaru ni mwenegiti wa kiama kia ene irabu county ya embu Alexander Kagoh Murwatetu uria augite nimarugamitie andu engi muno wira.
Kunari uguo avuri biashara aya maugite nimerigite kwandikira thirikari ino marua kumana na watho ucio mavitukitie nwati wendi wao ndwanathikirirua.
Avuri biashara aya riu nimavecanite mukana wa kuthii igotiri angikorwa thirikari timathikiriria , na makongerera kuvingwa kwa irabu nigugucungirira gucoka kwa jovi cia makavo.
Biashara ino ya wendia wa njovi countyiri ino ya Embu ikoragwa yandikite makiria ma andu 50, 000.
Mbica irutitwe online
Njagi Ndathi
