Avitha wa ugitiri njerari niwikitue ngono agikuruvanua na giiko gia kunyitana mugwate mwena wa Kasarani.
Avitha uyu uria urutagira wira njera ya Kamiti aikirue ngono vamwe na ekuirwa engi aria merikite makoretwe makirutithania wira nake, vuva wa giiko gia gwitia mbeca kuringa ithiga.
Ekuirwa aya aria maretuite maavitha kuuma ruvonge rwa uthuthuria wa wiki nai DCI merekinyirie thiini wa duka imwe mwena wa Githurai 44 varia maranyitire mundumurume umwe wa ukuru wa miaka 20 makieda kumuria ciuria.
Ndumiriri makiria ikiuga maracokire matonyie mundumurume uyu ngariri iria irameterere na yatwarithua nevenya , na vuva wa kavida kanini nyina wa mundumurume uyu avurirwa thimu na etua ngiri 50,000 niguo mwana wake arekererue .
Kuringana na rivoti ya maavitha a vorithi ,nyina wa mwanake uyu aratumire ngiri 5,000 vuva wa kuvewa mukana mwana wake nukuragwa na avewa mwerekera wa gutuma mbeca icio ciingi thiini wa namba ngurani cia thimu .
Kunari uguo nuravurire rivoti kuri maavitha a vorithi stationiri ya Kasarani aria marambiririe gucarania na ekuirwa .
Kuringana na komanda wa vorithi Kasarani Peter Mwanzo nimaravotire kumenya ngari ni ya uriku , uria urerire maavitha a vorithi ngari yake kwa irakomboretwe .
Ekuirwa maratigire mundumurume uyu ,Mwihoko vuva wa kumenya nimararumirirua nwati manyitikana mari varavarari ya Kamiti.
Wauguo maavitha a vorithi maugite avitha uyu wa njera anyitikanire na nvingu.
Wanja wa Njiru
Mbica irutitwe online
