Itigarite mithenya minini mwaka muceru wa gicukuru kwambiriria, munini wa speaker wa mbunge ya county ya Embu Steve Simba niuritie minister wa ruvonge rwa kithomo George Magoha kuthundura mutaratara muceru wa urivi wa vici tondu aciari amwe nimatete wira niundu wa murimu wa covid-19.
Simba uria nwake murugamiriri wa ward ya Runyenjes central, augite mutaratara uyu muceru niugutigirira ciana cionthe niciacoka cukuru na iria irikitie kirathi gia kanana ivote kuthii secondary cionthe.
Niauritie aciari gwitikirua kurikanira na arimu uria makavotaga kuriva vici tondu aciari onthe matirathimitwe undu umwe.
Simba athiite na mbere kuuga aciari aria mathomithagiria cukuru cia kwinuka cia secondary matige gukanyirirua niundu thirikari nio ivatie kuriva vici ya cukuru ino. Augite mutaratarari wa thirikari nene ni ati wa murutwa wa cukuru ya kwinuka ya secondary akoragwa akirivirwa vici ya ciringi 22,000.
Kavindari wakau niauritie Magoha gutecanirie watho uria urauga nwanginya murutwa akorwe akivituka mathomo monthe niguo gwika course ya warimu niundu watho uyu niuravingiriria arutwa engi muno gwika course iria marathimiritwe.
Mbica irutitwe online
–Njagi wa Ndathi-
