Kiravu kia Tusker FC nikigite na iringa inene ino ni vuva captain waao Hashim Sempala kuuma kiravuri giki vuva ya kurikia kandarathi yake ya miaka iiri na kiravu giki.
Sempala aumite kiravuri giki kavinda karia maramuvatara muno kugeria gucinda ligi ya vururi varia matigaritie mechi 6. Sempala niukoretwe ari muthaki wa vata muno na gwata makiria akithaka midfield.
Tusker Fc macindite nthumbi ino ya ligi ya vururi maita 11 na kavindari gaka niyo mari gacumbiri ka ligi ino maina pointi 55 varia mari pointi imwe tu iguru ya KCB ari niyo ai kairi.
Tusker Fc nimacokeretie ngatho muthaki uyu kuuma Uganda niundu wa utungata wake.
Mwenegiti wa kiravu giki kia Tusker nike Daniel Aduda niwikirite kirore muthaki uyu wa miaka 26 niumite kiravuri giki varia arongoreretie kuthii kiravuri kingi ngurani.
Sempala atonyire kiravuri kia Tusker mwaka wa 2016 kuuma kiravuri kia Uganda nikio Bul FC na ari timuri iria yacindire nthumbi igiri kimera kia mwaka wa 2016;varia macindire nthumbi ya ligi ya vururi na GOTV Shield Cup.
Kunari uguo mwaka wa 2019, Sempala niwacainire kandarathi na kiravu kia Gor Mahia. Mieri itandatu yavituka kandarathiri yake ya miaka iiri na Gor, Sempala niwacokire kiravuri kia Tusker na agioca mweke wa Duncan Ochieng na agituika captain wa kiravu giki.
Kaari wa Mugendi
Mbica irutitue online
