Vuva wa mathiga kwiinjwa kwareri marima nimatigagwa na magatwika ugwati kuri andu engi. Marima mama nimacungagirira ikuo, ndivangio na nginya kwongerereka kwa murimu wa Malaria tondu numavecaga rwagi kundu kwega kwa kurekeria matumbi.
Robert Kariuki uria ni mwikari wa itura ria Kiambatha Kigaa thiini wa ward ya Runyenjes Central county ya Embu na uria akoragwa na kware ya mathiga, niambiriritie kurithiria nthamaki marinari mama.
Akiaria na metha ya movoro ya Kimuri Fm, Kariuki niaugite iciria riri ria kurithia nthamaki riamukirire vuva wa kwona uria andu maragwa marinari mama na kigia ndivangio.
Wauguo, ongererete na kuga mbere ya kwambiriria urithia wa nthamaki marinari mau rwagi nirwamuthumburaga na njira nene tondu kware icio iri vakuvi na mucii gwake.
Akiambiriria urithi wa nthamaki ambire kwirigira marina mama wega nginya agitiga ona gutiri nyamu kana mundu angivota gutonya vakuvi na marina mama atari na rutha rwake na itanya ria kugitira nthamaki ciake.
Kurumirira kwiriga kwa Kariuki akigitira urithi wake nwavo nginya athiririe ugwati wa marina mama kuri andu aria maturanire nao. Umunthi, Kariuki ni umwe wa andu aria maratara vaita ya marima ma kware maria monagua mari ugwati ni andu engi.
Kariuki niuritie andu aria marutaga wira wa kware gutigirira ni matumira marima mama na njira ingimava vaita kana kumathika marikia kwinja mathiga niguo kunyivia ugwati wamo kuri andu vamwe na kumenyerera maria maturigicerie.
Mbica irutitwe online
–Njagi Ndathi
