Diana Nyokabi uria wagwatire marks 401 kuma county ya Bungoma riu niucoketwe ni gikeno vuva wa vici yake ya gutonya kirathi kia form 1 cukururi ya Moi High Eldoret kurivwa yonthe ya mwaka mugima.
Kiroto kia Nyokabi gia gutwika wakili kirekarii takwa kingikua kumana na acairi ake gutura mbeca ya gutonya secondary.
Kiroto giki gicokete mwoyo vuva wa Gavana wa Lamu Fahim Twaha kumurivira vici ya mwaka umwe cukururi ino ya Moi High Eldoret.
Akenya engi nimeyumiritie gutethia mwana uyu vamwe na mwiini Akothee uria uuritie mwingi unyitanire gutigirira mwana uyu niwathoma na kiroto giake nigiakinyanira.
Ng’ina wa mwana uyu Priscilla Nyanchera akiaria ari cukururi ya mucingi ya D.E.B Bungoma kuria aravirite Nyokabi gucokera kirathi gia kanana, augite aturite endagia kivanda kia sukuma niguo athomithie mwana uyu wake, arina mwirigiriro niakamurata thinari athoma.
Nyokabi augite niwakenete muno riria riitwa riake riari rimwe ria maria ma ciana iria ciari ithomithue ni Gavana Wycliffe Wangamati nwati uria rwita riake riavutirwe niundu wa kiriga.
Mwarimu munene wa cukuru ya mucingi ya D.E.B Bungoma Tobias Khisa augite niuramakire muno riria Nyokabi araukire gucokera arina marks 401 niundu wa gutura vici.
Khisa augite arari na kieva gwoca mwana uyu ringi tondu niungiratumire ciana iria cingi iture vata wa kuthoma na kiio angikorwa mwana nwa avituke na ature mbeca cia kuthii secondary.
Mbica irutitwe online
Njagi Ndathi
