Anduarume airi aria maagwatirwe ni maavithaa a vorithi mwena wa Kitui magikuruvanua na kunyita kiavinya mwiritu wa miaka 18 nimarevokwa gukinyua igotiri umunthi Jumaa tariki 30 mweri wa mugwanja mwaka wa 2021.
Biron Orwa wa miaka 25 na Samwel Mulama wa miaka 22 moorotetwe na kuva mwiritu uyu njovi iria yacangire ndakamenye maundu maria mekikaga mbere ya kumutwara nyombari yao kuria mamunyitire kiavinya.
Kuringana na ndumiriri ya maavitha a uthuthuria wa wikinai DCI, ngero ino yekikire jumatano utuku tariki 28 mweri uyu wa mugwanja.
Maavithaa ama maugite mwiritu uyu jumatano iyo muthenya nimathiite kiravu kia Monte Christo tauniri ya Kitui mari na munyanyawe na anduarume ama airi.
Niundu wa kuriwa, munyanya wa mwiritu uyu amutigire kiravuri na ekuirwa ama airi na athii agituguganaga nginya gwake.
Vuvari Orwa na Mulama makuanire murutwa uyu wa mwaka wa mbere thiini wa university varia moonirwe ni andu aria maturaniritie namo na mamenyithia maavitha a vorithi.
Umwe wa ekuirwa arethirwe ethithite rungu rwa gitanda nake ucio wingi akigwatirwa kiravuri giki kia Monte Christo kuria arathiite gwoca iratu cia mwiritu uyu.
Mwiritu uyu arethirwe atakuigua gitandari na avirwa civitari na Kitui county referral niguo kwamukira urigiti.
Mbica irutitwe online
-Mbuya Ngari-
