Thirikari na andu onthe makiria kauntiri ya Embu nimauritue kugwatanira niguo kuthiria mbaara cia kimicii. Ino ni miario yaritue ni Beatrice Karimi uria ni murungamiriri wa gikundi kia Women Initiative for Society Empowerment kana WISE makithomithia atumia kanithari wa ACK Kithegi wardiri ya Kithimu.
Mwenari wake Faith Gatavi uria ni mwikari wa guku Kithegi niugite ugimaria wa eritu ni ndeto imwe iria iracangira mbaara cia kimicii nauguo kuuria atumia gukorwa na murungamo munyinyu niguo kuthiria ugimaria wa eritu.
Kunari uguo mbaara ino ya ugimaria wa eritu niigumiritwe ni ugwati niundu vuva wa kuthitanga, mundu akoragwa ari ugwatiri wa kurutirirua utuku niundu atongoria a matura matiocaga makinyo maria mavatie nwati kuthii kuumbura mundu uyu kuri uria wikite giko giki kivituke ni mavinda, undu uria utumage andu engi gukirira ngero ino.
Gatavi riu niuritie thirikari gugitira aria mathitangaga ngero ino nimagitire niguo kugwatanira vamwe kuthiria ndeto ino mbituke ni mavinda na wavo kumauria kugwatirira mathoma ta mama ma WISE, niguo mbaara cia kimicii inyive na andu matige kuuragana na kuyuraga.
Mbica irutitwe online
-Mbuya Ngari-
