Ruvonge rwa ugima wa mwiri nirwaniririte arwaru engi aceru 591 a murimu wa COVID-19 vuva ya ithimi 4,737 gwikwa rungu rwa mathaa 24 mavituku.
Giki ni gicunji kia 12.5 vari igana ya arwaru na namba ya aria monekanite na murimu uyu ikinyite 204,271 nacio ithimi ciie 2,142,309 iria ciekitue.
Akenya ni 575 naao aria maumite nja ya vururi ni 16 varia 316 ni anduarume na atumia ni 275. Uria munini muno aina mieri 10 na uria mukuru aina miaka 87.
Minista wa ugima wa mwiri Mutahi Kagwe thiini wa ndumiriri yake augite arwaru 561 nimavorete kumana na murimu uyu wa COVID-19 varia 469 maramenyagirirua mucii naao 92 marari mathivitari matiganite guku vururiri. Aria mavorete makinyite 189,692.
Wauguo andu 24 nimakuite na cionthe ni ikuu ciacererue kumenyithanua niundu ciaumire mweri wa gatano, gatandatu na mugwanja mwakari. Namba ya aria makuite kumana na murimu uyu ni 3,970.
Kaunti ya Nairobi yandikithitie arwaru 422, Mombasa 34, Kiambu 19, Uasin Gishu 17, Garissa 14, Murang’a 10, Kirinyaga, Nyeri arwaru 9 wa kaunti, Busia 7, Narok 6, Kajiado, Laikipia, Machakos, Kakamega arwaru 4 wa kaunti, Baringo, Mandera, Embu, Nakuru, Nyandarua arwaru 3 wa kaunti, Siaya, Kisii arwaru 2 nacio kaunti cia Homa Bay, Kericho, Kilifi, Kitui, Meru, Nandi, Elgeyo Marakwet, Trans Nzoia na West Pokot ikiandikithia mundu umwe wa kaunti.
Andu 1,726,937 niyo mavetwe njanjo niundu wa murimu uyu wa Covid-19.
Kaari wa Mugendi
Mbica irutitue online
