Ruvonge rwa muvira wa maguru kauntiri ya Embu niruracakaya gikuu kia muthaki wa Kavuturi FC, Peterson Macharia, uria uragirikire na gukua vuva ya mechi yaao ya FKF Embu North District League muthenya wegoro.
Mwenegiti wa ruvonge rwa FKF kaunti ya Embu Charles Njagi augite Macharia niuragererie kuvewa utungata wa nevenya kivarori kia Kavutiri mbere ya kuvirwa thivitariri ya Embu Level Five kuria arakuirire.
Kuringana na Njagi, muthaki uyu wa miaka 25 niuragite na ngurario ndagikari cia mbere varia timu ya Kavuturi marathimanaga vinya na timu ya Jungle FC nwati eyumiriria nginyagia ndagika cia muthia.
Vuva ya mechi ino nivo Macharia araugire ndaregua wega na acoka kugirika. Athaki nimarageririe kumuva utungata wa nevenya gutaina umithio na nivo aratengerirue thivitariri ya Embu Level Five ni arigitani aria maracokiire kumenyithania gikuu giake.
Njagi niuritie macoach undumwe na managers kwithema na mtugo wa kuthakithia athaki aria mareyumiriria maina ngurario niguo kwithema na icanjama taino niundu ugima waao niguo wiina vata.
Muthaki wa kiravu giki kia Kavuturi Alex Murimi niugite timu ino niigite na iringa inene kurumirira gikuu kia Captain waao.
Murimi niwongererete Macharia niuramacukumaga muno gukorwa makirutira thiini wa mithako guku akiuga nimavati kuvewa kithomo kigii utungata wa nevenya kana First Aid mavinda gwa mavinda niguo mavonokie athaki kumana na mitino taino.
Mwenari wake Njagi niwitikirite timu cia District League iina mathina ma mbeca na matingivota kuandika madagitari varia auritie andu a wendi mwega na atongoria gutethereria timu ino gukinyaniria undu uyu. Akiuga athaki nimavatii kuvewa utungata wa urigiti gutaina marivi.
Riri ni riita raimbere gukoretwe kwiina mutino wa muthemba uyu kauntiri ino ya Embu nwati miaka ithatu mivituku kwaina athaki athatu kuuma kaunti nini ya Mbere magiire mutino wa varavara maumite mechi, ino miario ya Njagi.
Kaari wa Mugendi
Mbica irutitue online
