Thuguri yetu maturari itukinyitie iturari ria Gikuru wardiri ya Makima gicigo kia Mbeere ya Iveti kauntiri ya Embu niguo tuumenye ii ritwa riri ri, riathugurirwe naku.
Akiaraniria na kameme ga kimuri fm, umwe wa aria maatwire guku mavinda mau ma tene Josphat Nzambo niwereithitie ritwa riri Gikuru riaumanire na mwikamba wetagwa Gikuulu, uria wocikire gucoka ikamba.
Andu aria maturaniritie nake matiavotaga gutamuka ritwa riri na uguo maugaga guku ni gwa Gikuru ritwa riria riaukire nikinanyinya. Gikuulu atwire vakuvi na iriuko.
Andu guku muno muno mari arithi gutari na urimi nwati riu nwarithiite nambere gukura andu wamagitonyagirira maundu ma urimi wana mbiacara.
Kunari uguo, kuri na maundu matigitwe vuva iturari riri ta gutura gwa cukuru ya seondary na civitari iri vakuvi na riu nimauritie thirikari kumaakira nigo ciana ciao itige kuthii kuraca na nginya mundu arwara nuukuvota kuvinyurua civitari nevenya.
Ekari guku nimairutaniritie na kwambiriria thoko ya Gikuru nwati nayo niigumiritwe ni mathina ma thitima na wavo utheri wa thoko ino ni thina niundu gutire na cioro cia kanju kana vandu andu mangita takataka. Riu nimauritie mutongoria wao Phillip Nzangi kumatethereria kwagirithia thoko ino.
–Mbuya Ngari-
