Thirikari niyongererete kavinda ga kwiyandikithia niguo murutwa avote gwika kigeranio kia KCPE na KCSE na ciumia ciingi igiri.
Thiini wa ndumiriri iria irekereretue muthenya wa umunthi, minista wa kithomo Prof George Magoha augite muvango uyu ukathii nambere nginyagia tariki 14 mweriri kuvecana kavinda keganu ga gutigirira cukuru niciavota kuandikitha arutwa onthe.
Muvango uyu wa kuandikithia arutwa wambiririe tariki 2 mweri wa gatandatu na wavingiritue gukinya muthia tariki 31 mweri wa mugwanja mwakari. Ministry ino yongererete kavinda gaka kurumirira wendekithia uria wavecanirue ni anene a macukuru.
Muvango uyu ugacoka urumirirue ni uria wa gutigirira ndumiriri iria yandikithitue igii murutwa niyo yagirire na uyu naguo ugekika gatagati ga tariki 16 nginyagia 27 mweriri.
Aria matakeyandikithia niundu wa gwikarira igeranio ino cia kivururi na iria itanyitue gwikika mweri wa kathatu mwaka muku magetikirua gwika igeranio ino mweri wa december mwaka muku. Arutwa kuandikithua macereretue gutietikiritue.
Niundu wa macukuru maria maina arutwa rungu rwa 30, magetikirua kuthii thiini wa macukuru mengi maria mari vakuvi naao gwikira kigeranio kuo. Macukuru ma arutwa aria maina mavataro mwanya kana mawathe magetikirua gwikira kigeranio kuria meyandikithitie gutakumakania ni egana.
Kavindari wakau, arugamiriri anene a kithomo thiini wa kaunti nini nimauritue kuvecana mutaratara wa macukuru maria magekira igeranio macukururi mengi mbere ya tariki 10 mweri wa kenda mwakari kuri kanju ya kuramata igeranio cia kivururi.
Igikinya tariki 31 mweri muvituku ni arutwa 1,218,892 mandikithitue thiini wa ituo 28,248 gwika kigeranio kia KCPE naao 824,392 thiini wa ituo 10,384 gwika kigeranio kia KCSE.
Kaari wa Mugendi
Mbica irutitue online
