Anake airi aria ni mundu na murwa ng’ina umunthi uyu methiritwe mari akuo mocariri ya civitari ya Embu level 5, mithenya ithatu vuva wa gwikua ngono niundu wa kwagarara makinyo ma kurua na murimu wa covid-19.
Benson Njiru wa miaka 22 na Emanuel Mutura wa miaka 19 monirwe mwico mari mwoyo tauniri ya Kianjokoma njumaviri utuku riria meekagua ngono ni maavithaa a vorithi niundu wa gukorwa mari nja mavinda ma mwiyugo kana curfew mari makinyu.
Riu mucii wa anake ama uugite mauragirwe ni maavithaa a vorithi. Kunari uguo, munene wa vorithi wa Embu ya irathiro Emily Ngaruiya augite anake ama airi makuire vuva wa gutuva ngaari ya vorithi ithiite.
Augite ndivangio iria maagire vuva wa kugwa ramiri mathaari ma thaa inya na nuthu cia utuku njumaviri nicio ciacangire gukua kwao, varia ongererete na kuuga maavitha a vorithi mamenyire anake ama airi matiri vo makinya gituori kia vorithi kia Manyatta.
Vuva wa gucoka kumacutha nirio meethire mari na ndivangio ciongo na kumavira civitari ya Embu Level 5 makarigitwe kuria merikanire ni akuo vuva wa gukinya.
Riu Ngaruiya augite uthuthuria niwambiriritie niguo kumenya kana maavithaa aria mari wira mathaari mau nimarutire wira uria kwagiririkite niguo kurigiriria ndeto ino.
Mbica irutitwe online
-Mbuya Ngari-
