Munini wa inspecta general wa vorithi Edward Mbugua niwamurithia kuthamithua kwa OCS wa Manyatta Abdullahi Yaya na OCPD wa Embu ya iguru Emily Ngaruiya, vuva wa anake airi gukua na njira kiriga.
Akiaria ari Embu muthenya wa umunthi augite nimagukorwa marikitie gwika uthuthuria wa ikuo cia Benson Njiru uria urari na ukuru wa miaka 22 na Emmanuel Mutura wa ukuru wa miaka 19 , vari kavida ga kiumia kimwe.
Atongoria engi nimarekinyitie guku ari vamwe na mumbunge wa Runyenje Eric Muchangi uria ukumite ciiko cia wiki nai iria ciongererekete mwena wa Kianjokoma.
Wauguo niworotete maavitha a vorithi niundu wa kuragwa kwa mundu umwe vindi ya mirurungano iria ikoretwe kuo ya kumenereria kuuragwa kwa anake acio.
Mwenari wake mumbunge wa kithukio Cecily Mbarire auritie uthuthuria wikwe vuva wa mundu umwe kurathwa kiongori na gukuwa vindi ya mirurungano vamwe na uthuthuria wa ikuo cia Njiru na Mutura .
Nake mwenegiti wa ruvonge rwa kuramata uruti wira wa maavitha a vorithi IPOA augite maavitha ruvongeri ruru nimambiriritie gwika uthuthuria .
Wanja wa Njiru
Mbica irutitwe online
