Umariru na riera ria thayu niicokereretie tauniri ya Kianjokoma kauntiri ya Embu vuva wa gukorwa na thagatha vari kavinda ka mithenya iiri varia ekari makoretwe makirurungana vuva wa ikuo cia anake airi aria ni mundu na muruwanyina Emmanuel Mutura na Benson Njiru aria makuire na njira kiriga.
Mirurungano ino icangiririte gikuo kia mundu wingi umwe na andu engi magitigwa na ndivangio.
Akiaria ari tauniri ya Kianjokoma munini wa inspecta general wa vorithi Edward Mbugua nuritie ekari gucokia thayu varia augite OCS Abdullahi Yaya na OCPD Emily Ngaruiya a gicigo giki na aria mokoretwe makiorotwa nigukorwa makiagagia ekari nimatiramitue wira.
Mwenari wake mwenegiti wa ruvonge ruria ruroragia uruti wira wa vorithi IPOA, Anne makori, nucakaite na andu a mucii wa anake aya varia eririte nimareka uthuthuria wa ikuo ino na njira iria yariririkite.
Nayo mivango ya mathiko ma anake aya makithii nambere aria magumiritwe ni ikuo ino nimauritie kuvewa kavinda kega ga kumacakaa kuri na ugitiri.
Kithimi kia postmortem, kiria kirekirwe thivitari ya Embu level 5 kionanitie anake aya monekanite gukua niundu wa kuunika mbaru na ndivangio cia kiongo iria ironekana icangiritwe ni kuringwa na kindu gituvu.
Mbica irutitwe online
-Wanja Njiru-
