Spika wa bunge ya vururi Justin Muturi niaugite aira aria monire uria maundu mavanaga gatagatiri ka maavitha a vorithi na anake airi aria ni Benson Ndwiga na murwa ng’ina Immanuel Mutura mbere ya magacemanitie na ikuo ciao iria ciai na kiriga kinene mavewe ugitiri mukinyaniru.
Akiaria riria aracererete mucii wa anake aya mwena wa Kianjokoma countiri ya Embu niauritie aira meyumirie na mavecane wira wao na wauguo auria nvonge cia ugitiri matigirire gutiri vindi igakinya miturire ya aira aya igakorwa i ugwatiri.
Niathiite na mbere kuuga utuiria wikwe niguo kumenya kiria kia virire maavitha aya a vorithi kuthii mururunganori na ngari iria yatumikire gukua miri ya anake aya na kuroria mwingi ukimivivie matakumagiria gwika giko giki.
Wauguo Muturi niaugite mwingi uvatie kunyita itemi riria maundu ma uruti wira wa maavitha a vorithi uracenjua niguo macangire mienari iria marona maavitha aya mavatii gucenjia.
Mbica irutitwe online
Njagi Ndathi
