Thogoro wa maguta nducenjetie ri rita ria kairi vuva wa ruvonge rwa kuramata thogoro wa maguta EPRA kuuga mbei wa iria iratumikaga nwayo ikuthii nambere na gutumika.
Kurega kwongerereka kwa mbei ya maguta gukite wa riria mbei ya gukinyia maguta guku kenya ivandite.
Thogoro wa gukinyia super petrol vururiri uyu kwongererekete na gicunji kia 6.21 vari lita 1000, ya diesel ikiongerereka na gicunji kia 7.36 nayo ya maguta ma taa ikiongerereka na gicunji kia 9.8.
Itua riri riukite kuvonokia akenya kumana na mbei iri iguru ya maguta kuma mavururiri ma na nja.
Super petrol mwena wa Embu niirungamira ciringi 128.24 vari lita, diesel irungamire ciringi 108.77 vari lita namo maguta ma taa marungamire ciringi 98.95.
Thogora uyu niuthii nambere kurumirirwa nginya riria EPRA magekara nthi ringi na kuroria kana nimakwongerera mbei ino kana irungamire wa vau kana meekurukie.
Mbica irutitwe online
-Mbuya Ngari-
